Դեսպան Արմեն Պապիկյանի հայտարարությունը Ադրբեջանում ատելության հիմքով հանցագործությունների անպատժելիության խրախուսման վերաբերյալ

04 հունիսի, 2020

Հունիսի 4-ին տեղի ունեցած ԵԱՀԿ Մշտական խորհրդի 1270-րդ նիստի օրակարգում Հայաստանի նախաձեռնությամբ ներառվեց «Ատելության հիմքով հանցագործությունների անպատժելիության խրախուսումը Ադրբեջանում» հարցը, որի շուրջ ԵԱՀԿ-ում Հայաստանի մշտական ներկայացուցիչ, դեսպան Արմեն Պապիկյանը հանդես եկավ Ադրբեջանում ատելության խոսքի արդարացման վերաբերյալ հայտարարությամբ:

Դեսպան Պապիկյանը մասնակից պետությունների ուշադրությունը հրավիրեց ՄԻԵԴ-ի ս.թ. մայիսի 26-ի «Մակուչյանը և Մինասյանն ընդդեմ Ադրբեջանի և Հունգարիայի» գործով դատավճռի և 2004թ. Հունգարիայում տեղի ունեցած դատավարության մանրամասներին: Ներկայացրեց մարդասպանի արտահանձնման, ներման և հերոսացման ընթացքը՝ շեշտելով ադրբեջանական բարձր իշխանությունների կողմից շարունակաբար դրսևորվող հայտայացության և ատելության խոսքի փաստը:

Դեսպանն ընդգծեց, որ հարցը բարձրացնելու նպատակն է ԵԱՀԿ մասնակից պետություններին ներկայացնել, որ այն անձինք, որոնք այսօր միջազգային հանրությանը փորձում են ապացուցել խաղաղությանն և հանդուրժողականությանն իրենց հանձնառության իսկությունը, այդ նույն անձինք են, որոնք հերոսացնում են ատելության հիմքով իրականացված մարդասպանությունը:

Անդրադարձ կատարվեց Ադրբեջանի բարձրաստիճան պաշտոնյաների ամոթալի վարքագծին, ներառյալ Նախագահի կայքում բացված հատուկ էջին, որի նպատակն էր մարդասպանի արդարացումը՝ զուգորդված հերոսացմամբ:

Համառոտ ներկայացնելով դատարանի վճիռը՝ դեսպանը նշեց, որ Ադրբեջանը խախտել է Մարդու իրավունքների եվրոպական կոնվենցիայի 2-րդ (Կյանքի իրավունք) և 14-րդ (Խտրականության արգելում) հոդվածներով նախատեսված պարտավորությունները:

Հղում կատարելով դատավճռի համապատասխան կետերին՝ նշեց, որ Ադրբեջանի կառավարության փորձերը ժխտելու և արդարացնելու Գուրգեն Մարգարյանի սահմռկեցուցիչ սպանությունը և սպանության փորձը հերքվել է թե՛ Հունգարիայի դատարանի և թե՛ ՄԻԵԴ-ի կողմից: Ավելին, դատարանի վճռով հաստատվել է, որ մարդասպանի արդարացումը և հանցագործության հերոսացումը պայմանավորված է եղել զոհերի էթնիկ պատկանելիությամբ:

Հիշատակվեց, որ Ադրբեջանի գործողությունները արժանացել են խիստ դատապարտման բազմաթիվ երկրների և միջազգային կառույցների կողմից, որոնց թվում են Եվրոպայի Խորհուրդը, Եվրոպական Միությունը և Եվրոպական Խորհրդարանը, որն ընդունել է համապատասխան բանաձև այդ կապակցությամբ: Դեսպան Պապիկյանն ընդգծեց, որ մինչ օրս Ադրբեջանը որևիցե մակարդակով չի զղջացել այս արգահատելի հանցագործության համար: Ավելին, ադրբեջանական իշխանությունները պետական բարձր մակարդակով շարունակում են իրենց հատկանշական ոճով արդարացնել ատելության և էթնիկ պատկանելության հիմքով կատարված հանցագործությունը:

ՀՀ մշտական ներկայացուցիչը շեշտեց, որ Ադրբեջանի շարունակական քաղաքականությունը, որն ուղղորդվում է պետական մակարդակով հայատյացության խրախուսմամբ և իր արտացոլումն է գտել նաև ՄԻԵԴ-ի կողմից հրապարակված դատավճռում, գալիս է ևս մեկ անգամ հաստատելու, որ Ադրբեջանը երբևէ չի կարող ստանձնել հայկական բնակչության որևէ հատվածի անվտանգության պատասխանատվությունը: Ավելին, Արցախի ժողովուրդը չի կարող մնալ առանց պաշտպանության համար անհրաժեշտ անվտանգության գծերի:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր