ԵԱՀԿ-ում ՀՀ մշտական ներկայացուցիչ, դեսպան Արմեն Պապիկյանը Մշտական խորհրդին անդրադարձավ Արցախի և Հայաստանի դեմ Ադրբեջանի՝ Թուրքիայի և օտարերկրյա զինյալ ահաբեկիչների ներգրավմամբ ագրեսիայի հարցին

19 նոյեմբերի, 2020

Նոյեմբերի 19-ին ԵԱՀԿ Մշտական խորհրդի նիստի օրակարգի «Ընթացիկ խնդիրներ» կետի ներքո Հայաստանի պատվիրակության նախաձեռնությամբ ներառված «Ադրբեջանի՝ Թուրքիայի և օտարերկրյա ահաբեկչական մարտիկների ներգրավմամբ ագրեսիան Արցախի և Հայաստանի դեմ» վերտառությամբ հարցի շուրջ ելույթով հանդես եկավ ԵԱՀԿ-ում Հայաստանի Հանրապետության մշտական ներկայացուցիչ, դեսպան Արմեն Պապիկյանը։

Դեսպանն իր ելույթում անդրադարձավ 44 օր տևած պատերազմի ընթացքում Ադրբեջանի զինված ուժերի կողմից իրագործած ռազմական և մարդկության դեմ

հանցագործություններին, Ադրբեջանի վերահսկողության տակ հայտնված տարածքներում հայկական պատմամշակութային ժառանգությունն վերացնելու արդեն իսկ արձանագրված փորձերին, Արցախի դեմ պատերազմում Սիրիայից օտարերկրյա զինյալ ահաբեկիչների և ջիհադիստների ներգրավմանը, Թուրքիայի քաղաքական և հատկապես ռազմական անմիջական մասնակցությանը։

Եզրափակելով իր ելույթը՝ դեսպան Պապիկյանը նշեց, որ հաշվի առնելով Թուրքիայի ուղղակի մասնակցությունը Ադրբեջանի կողմից Արցախի և Հայաստանի դեմ սանձազերծած ագրեսիայում, ինչպես նաև Թուրքիայի աջակցությամբ օտարերկրյա զինյալ ահաբեկիչների և ջիհադիստների ներգրավումը Հարավային Կովկասում, Հայաստանն այլևս չի համարում Թուրքիային ԵԱՀԿ Մինսկի խմբի իրավասու և հավասար անդամ։ «Թուրքիան չի կարող և չպետք է որևէ դեր ունենա Լեռնային Ղարաբաղի հակամարտության կարգավորման գործում, քանի որ իր գործողություններով խոչընդոտում է կարգավորման գործընթացում որևէ առաջընթացի հնարավորությունը։ Կոչ ենք անում մասնակից պետություններին շարունակել ճնշում գործադրել Թուրքիայի վրա՝ Հարավային Կովկասից իր զինված անձնակազմը, սպառազինությունը, փոխկապակցված ահաբեկչական և ջիհադիստական խմբավորումները դուրս բերելու, ինչպես նաև իր ագրեսիվ և ապակայունացնող քաղաքականությունը դադարեցնելու համար»։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր