ԵԱՀԿ Անվտանգության համագործակցության ֆորումի ՀՀ նախագահության նիստը՝ նվիրված նոր սերնդի պատերազմների մարտահրավերներին

12 մայիսի, 2021

Մայիսի 12-ին ՀՀ նախագահության ներքո տեղի ունեցավ ԵԱՀԿ Անվտանգության համագործակցության ֆորումի (ԱՀՖ) նիստը՝ նվիրված նոր սերնդի պատերազմների մարտահրավերներին:

Բացելով նիստը՝ ԵԱՀԿ ԱՀՖ նախագահ, ԵԱՀԿ-ում ՀՀ առաքելության ղեկավար, դեսպան Արմեն Պապիկյանը ներկայացրեց զենքերի և տեխնոլոգիաների զարգացման անվտանգային հետևանքները։ Նա, մասնավորապես, նշեց, որ դրանք կարող են բազմապատկել առկա սպառնալիքները, նպաստել նոր վտանգների առաջացմանը և սպառազինությունների մրցավազքի: Ավելին, հեռակառավարվող և գերճշգրիտ զինատեսակների օգտագործումը, որոնք հնարավորություն են տալիս ոչնչացնել հակառակորդի ոչ միայն ռազմական ներուժը, այլև առանցքային ենթակառուցվածքները, կարող են խրախուսել պետություններին՝ դիտարկելու ուժի կիրառումը որպես հակամարտությունների և վեճերի կարգավորման ընդունելի տարբերակ: Միևնույն ժամանակ, գերճշգրիտ զենքերի օգտագործման արդյունքում քաղաքացիական բնակչության շրջանում զոհերի մեծ թիվը փաստում է, որ նման սպառազինությունների կիրառումը չի ծառայում քաղաքացիական զոհերից խուսափելու հիմնական նպատակին, ավելին՝ շատ ժամանակ բերում է քաղաքացիական բնակչության դեմ դրանց միտումնավոր կիրառմանը։ Նշվեց, որ ԵԱՀԿ տարածաշրջանում հակամարտությունների առկայության և ուժի կիրառման, սպառազինությունների վերահսկման ռեժիմների թուլացման և ԵԱՀԿ մասնակից պետությունների միջև աճող տարաձայնությունների պայմաններում անհրաժեշտ է պատշաճ ուշադրություն դարձնել սպառազինությունների ոլորտում արագընթաց զարգացումներին:

Նիստին բանախոսություններով հանդես եկան ՀՀ Պաշտպանության նախարարության գնդապետ Ժիրայր Ամիրխանյանը, ՄԱԿ-ի Զինաթափման գիտահետազոտական ինստիտուտի աշխատակից Սառա Մարի Գրանդ Կլեմենտը և Անվտանգային քաղաքականության Ժնևի կենտրոնի անվտանգության և իրավունքի ծրագրի ղեկավար Թոբիաս Վեստները։

Մասնակից պետությունների ուշադրությունը հրավիրվեց 2020թ. Ադրբեջանի կողմից Արցախի և վերջինիս քաղաքացիական բնակչության դեմ ծանր զինատեսակների, ներառյալ LORA տեսակի գերճշգրիտ բալիստիկ հրթիռների և մարտական անօդաչու թռչող սարքերի կիրառման վրա: Ներկայացվեց 2016թ. Արցախի դեմ Ադրբեջանի սանձազերծած պատերազմից հետո Ադրբեջանի կողմից ձեռք բերված զինատեսակների ծավալը՝ որպես Արցախի դեմ նոր պատերազմի նախապատրաստվելու նշան:

Նշվեց, որ 2020թ. Արցախյան պատերազմի հետևանքները մասնակից պետությունների համար պետք է ծառայեն՝ որպես ուժի կիրառման անթույլատրելիության և սպառազինությունների վերահսկման արդյունավետ մեխանիզմների ապահովման անհրաժեշտության մշտական հիշեցում:

Բանախոսները ներկայացրեցին սովորական սպառազինությունների ոլորտում վերջին զարգացումները, զինատեսակների և տեխնոլոգիաների զարգացման հեռանկարները և դրանց հնարավոր անվտանգային հետևանքները: Անդրադարձ կատարվեց նորագույն զինատեսակների մարտահրավերները հասցեագրելու գործում ԵԱՀԿ դերին և կարողություններին:

Նիստին ելույթներով հանդես եկան ԵԱՀԿ մասնակից երկրների պատվիրակությունները, որոնք բարձր գնահատեցին ԵԱՀԿ ԱՀՖ շրջանակներում նոր սերնդի պատերազմների մարտահրավերների թեմայով քննարկումներ կազմակերպելու Հայաստանի նախաձեռնությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր