ԵԱՀԿ-ում ՀՀ մշտական ներկայացուցիչ, դեսպան Արմեն Պապիկյանը Մշտական խորհրդի նիստին անդրադարձավ Ադրբեջանում հայ ռազմագերիների և այլ գերեվածված անձանց հարցին

20 մայիսի, 2021

Մայիսի 20-ին ԵԱՀԿ Մշտական խորհրդի նիստի օրակարգի «Ընթացիկ խնդիրներ» կետի ներքո Հայաստանի պատվիրակության նախաձեռնությամբ ներառվեց «Հայ ռազմագերիների և այլ գերեվարված անձանց իրավիճակը Ադրբեջանում» վերտառությամբ հարցը, որի շուրջ ելույթով հանդես եկավ ԵԱՀԿ-ում Հայաստանի Հանրապետության մշտական ներկայացուցիչ, դեսպան Արմեն Պապիկյանը։

Դեսպան Պապիկյանը նշեց, որ Արցախի դեմ Ադրբեջանի և նրա դաշնակիցների կողմից սանձազերծած պատերարազմին վերջ դրած նոյեմբերի 9-ի հայտարարությունից նույնիսկ վեց ամիս անց Ադրբեջանը շարունակում է անօրինական կերպով պահել հայ ռազմագերիներին և քաղաքացիական անձանց՝ բացահայտ կերպով խախտելով միջազգային իրավունքը, Ժնևի կոնվենցիաները, Մարդու իրավունքների եվրոպական դատարանի (ՄԻԵԴ) որոշումները և լիովին անտեսելով միջազգային հանրության բազմաթիվ կոչերը: Նա նաև նշեց, որ Ադրբեջանը, կեղծ և մտածածաին նարատիվներ տարածելով, փորձում է խեղաթյուրել հայ ռազմագերիների և այլ գերեվարված անձանց կարգավիճակը:

Դեսպան Պապիկյանն այնուհետև ներկայացրեց Ադրբեջանի կողմից հայ ռազմագերիների և այլ գերեվարված անձանց հանդեպ կտտանքների և դաժան վերաբերմունքի մասին փաստերը՝ ներառյալ գերությունից վերադարձաց անձանց բժշկական քննության արդյունքները և նրանց վկայությունները: Այս առումով ՀՀ մշտական ներկայացուցիչը ևս մեկ անգամ ընդգծեց հայ ռազմագերիների և այլ գերեվարված անձանց կյանքին և առողջությանը վտանգի իրական սպառնալիքը:

Դեսպան Պապիկյանը նաև մտահոգություն հայտնեց Ադրբեջանի գլխավոր դատախազի հայտարարության կապակցությամբ՝ հայ ռազմագերիների դեմ հարուցված «ահաբեկչության» հիմքով կեղծ և մտածածին մեղադրանքների գործի քննությունը մոտ ժամանակներում ավարտելու մասին: Այս առումով ՀՀ մշտական ներկայացուցիչը նշեց, որ Ադրբեջանը իր սեփական երկրում ընդդիմադիր գործիչներին լռեցնելու և բանտերը նրանցով լցնելու տարիներ ի վեր կուտակած փորձը և գործիքակազմը՝ այդ թվում կտտանքները և ֆիզիկական և հոգեբանակն բռնության կիրառումը, այժմ ծառայեցնում է հայ ռազմագերիներից այսպես կոչված «խոստովանություններ» կորզելու համար:

Ավարտելով իր ելույթը՝ դեսպան Պապիկյանը ևս մեկ անգամ կոչ արեց ԵԱՀԿ մասնակից երկրներին ճնշում գործադրել Ադրբեջանի վրա՝ վերջինիս անօրինական գործելաոճը դադարեցնելու և միջազգային պարտավորությունները կատարելու և հայ ռազմագերիների և այլ գերեվարված անձանց անհապաղ ազատ արձակելու նպատակով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր