ԵԱՀԿ Անվտանգության համագործակցության ֆորումի ՀՀ նախագահության նիստը՝ նվիրված փոքր սպառազինությունների ու թեթև զինատեսակների և սովորական զինամթերքի պաշարների ոլորտում ԵԱՀԿ աջակցության մեխանիզմին

07 հուլիսի, 2021

Հուլիսի 7-ին ԵԱՀԿ ԱՀՖ նախագահ, ԵԱՀԿ-ում ՀՀ առաքելության ղեկավար, դեսպան Արմեն Պապիկյանի նախագահությամբ տեղի ունեցավ ԵԱՀԿ Անվտանգության համագործակցության ֆորումի (ԱՀՖ) նիստը՝ նվիրված փոքր սպառազինությունների ու թեթև զինատեսակների (ՓՍԹԶ) և սովորական զինամթերքի պաշարների (ՍԶՊ) ոլորտում ԵԱՀԿ աջակցության մեխանիզմին:

Բացելով նիստը՝ դեսպան Արմեն Պապիկյանն անդրադարձավ փոքր ու թեթև զենքերի ավելորդ ու ապակայունացնող կուտակումներից և անվերահսկելի շրջանառումից բխող անվտանգային մարտահրավերներին՝ նշելով, որ փոքր ու թեթև զենքերը խոչընդոտում են հակամարտությունների կանխարգելմանը ու կարգավորմանը, խախտում մարդու իրավունքները, խոչընդոտում կայուն զարգացմանը, սնուցում ահաբեկչություն ու կազմակերպված հանցավորություն: Դեսպան Պապիկյանն ընդգծեց, որ ՓՍԹԶ ապակայունացնող կուտակումների և անվերահսկելի ու անօրինական շրջանառության դեմ պայքարը պահանջում է վերահսկողության արդյունավետ և ուժեղ ազգային մեխանիզմներ, ինչպես նաև միջազգային համագործակցություն:

Հանդիպմանը՝ որպես բանախոսներ, մասնակցեցին Չերնոգորիայի պաշտպանության նախարարության ՓՍԹԶ ու ՍԶՊ հարցերով ավագ խորհրդական, փոխգնդապետ Նեբոյսա Լուկովիչը, Ավստրիայի պաշտպանության նախարարության զենքերի ու զինամթերքի լոգիստիկ հարցերով կարողությունների կառուցման բաժնի ղեկավար Վերներ Կերնմայերը և ԵԱՀԿ Հակամարտությունների կանխարգելման կենտրոնի ԱՀՖ աջակցության բաժնի պետ Ռոբին Մոսինկոֆը, ովքեր ներկայացրեցին ՓՍԹԶ ու ՍԶՊ ոլորտում ծրագրերի արդյունավետության ապահովման հիմնական նախապայմանները և ԵԱՀԿ աջակցությունն այս ուղղությամբ:

Հանդիպմանը ներկայացվեցին մասնակից պետությունների ազգային ջանքերը ՓՍԹԶ ու ՍԶՊ վերահսկողության և դրանց անվտանգ ու ապահով պահպանման ուղղությամբ: Ընդգծվեց ԵԱՀԿ համապատասխան հանձնառությունների անշեղ կատարման անհրաժեշտությունը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր